ඩයලොග් වැදගත් විදිහට පික්පොකැට් ගහන්නේ මෙහෙමයි

ඩයලොග් සමාගම කියන්නේ අද ලංකාවේ තිබෙන අංක එකේ විදුලි සංදේශ සමාගමක්  කියල කියන්න ඕන නෑනේ. මේ සමාගම මහලොකුවට මෙහෙම කෑගැහුවට මේ තත්වෙට ඇවිල්ල තියෙන්නේ අහිංසක මිනිස්සුන්ගේ සාක්කුවලින් පික් පොකට් ගහල කියන්න ඕනෙත් නෑ කියල මම හිතනවා. තමන්ගේ පාරිබ්භෝගිකයින්ව රවටලා බිල් සෑදීම , තමන්ගේ පාරිභෝගිකයින්ට වට්ටම්,බෝනස් දෙනවා යැයි කියමින් මුලා කිරීම ගැන මේ සමාගම තියෙන්නේ හොද ඉතිහාසයක්.මම මෙහෙම කියන්න හේතුව ඩයලොග් සමාගමේ සකලවිධ සේවාවල වසර තුනකටත් වඩා පාරිභෝගිකයකු වී සිට ලැබු අමිහිරි අත්දැකීම්  මතිනි. අවසානයේ ඩයලොග් TV හැර අනෙක් සියලුම ඩයලොග් සේවාවලට සමුදුන්නේ ඩයලොග් TV කෙරේ ඇති හිතේ උපන් ප්‍රේමයෙන් නොව පියෝ ටීවී වල ඇති ලෝඩින් , නෝ සිග්නල් නිසාමය.

කෙසේ නමුත් අද මට ඩයලොග් ද එපාම වී ගියේ මගේ රූපවාහිනී තිරයේ ඩයලොග් එකෙන් එවු නිවේදනයක් කියවීමෙන් පසුවයි. මම පසුගිය දෙසැම්බර් 25 දින  HBO නැමති නාලිකා සමූහය ක්‍රියාත්මක කර ඇති බවත් එයට ස්තුතිවන්ත වන බවත් එහි සදහන් විය. ඊට අමතරව ඒ සදහා රුපියල් 399 සහ බදු ඇතුලත් බවද සදහන් වුනි. මම ක්ෂණිකව නැමති නාලිකාව ක්‍රියාත්මක කර බැලුවෙමි.එය ක්‍රියාත්මකය.ඊට අමතරව HBO නමින් ඇති තවත් නාලිකා හතරක් ද ක්‍රියාත්මක වන බව පෙනුනි.පුදුමයට කරුන නම් මෙය මම හෝ පවුලේ කිසිම කෙනෙකු ඇක්ටිවේට් කර නොතිබීමත් කිසිමදාක HBO වැනි නාලිකා නොබැලීමත්ය. මම ඩයලොග් හොට් ලයින් එකවන 0777-679679දුරකතන ඇමතුමක් ගතිමි.හොට් ලයින් එකේ විනාඩි 7 පමණ ඇති පදම් හොට් වීමෙන් පසු පොරක් ඉතාම ආදරයෙන් අනිත් පැත්තෙන් කතා කරනු ඇසුනි, මම ඔහුට මගේ සියලුම විස්තර ලබා දී මගේ ගැටලුම කීවෙමි.ඔහු කීවේ එක්තරා ජංගම දුරකතනයකින් කෙටි පණිවුඩයක් මාර්ගයෙන් මෙය සක්‍රීය කර ඇති බවය.

හේ නොපැකිලිවම ඒ දුරකතන අංකය ද ලබා දුන්නේය.නමුත් එය කිසිදාම නො ඇසූ අංකයක් වීමෙන් මම මවිත විමි.තවදුරටත් සොයා බැලීමේදී ඩයලොග් නාලිකා සක්‍රීය කිරීම කෙටි පණිවුඩ මාර්ගයෙන් කල හැකි බවත් ඒසදහා උවමනාවන්නේ ඩයලොග් ගිණුම් අංකය සහ නාලිකා අංකය පමණක් බවත් දැනගන්න ලැබුණි.සිද්ධිය පැහැදිලිය කිසිවෙකු වැරදියට මගේ ගිණුම් අංකය යොදා කෙටි පණිවුඩය යවා ඇත.

ON  {Account Number} { Channel Number}

මෙය මොනතරම් හොර තක්කඩි වැඩක්ද කියා කියන්න උවමනා නැත, තමන්ගේ එකේ බිල අහද්දී පවා නම,වයස, ජාතික හැදුරුම්පත් අංකය , ලිපිනය පවා අසන මෙම සමාගම මෙසේ තීරණාත්මක ක්‍රියාවකදී කිසිවක් නොවිමසා කටයිතු කරන්නේ ඇයි?

පාරිභෝගිකයාට වේගවත් සේවාවක් දෙනවා කියන්නේ මෙයද?වේගය නොව ඔවුන්ට උවමනා කාගෙන් හරි පික් පොකැට් ගැසීමට නොවේද?මෙවැනි ක්‍රියාමීට පෙර කොතරම් වෙන්න ඇතැයි මම දුරකතන ක්‍රියාකරුගෙන් විමසුවෙමි, එහෙම වෙනවා සර් නමුත් එහෙම කෙටි පණිවිඩයක් එවලා නැත්නම් අපි සල්ලි රිපන්ඩ් කරනවා, ඒ ඔහුගේ පිලිතුරයි.ඉතින් කීයෙන් කීදෙනෙක් තමන්ගේ රූපවාහිනියට එන දැන්වීම් කියවනවාද? කීදෙනෙක් නම් තමන්ගේ මාසික බිල බලනවාද? එන ගානක් ගෙවලා දාන කීදෙනක් ඉන්නවාද? ඩයලොග් එකෙන් අපි ඉස්සරහම අපේ පොකට් එකට කෙලිනවා නේද?

මම ඩයලොග් සමාගමට මේ සම්බන්ද පැමිණිල්ලක් ඉදිරිපත් කල අතර ඔවුන් එය පැය 48 ඇතුලත ව්සදා දෙන බවට පොරොන්දු  විය, ඊට අමතරව මම මෙය විදුලි සංදේශ නියාමන කොමසමටද දැන්වීමි. ඒසී කාමර වල පු‍ටු රත්කරන විදුලි සංදේශ නියාමන කොමිසමේ ඉන්න නිකමුන් ගෙන් නම් කිසිම වැඩක් නැති බව සක් සුදක් ලෙස මම දනිමි. නමුත් මෙවැනි බහුජාතික සමාගම් වලට ඕනා විදිහට නටන්න ඉඩ ලැබෙන්නේ  ඔය කොමිසමේ ඉන්න පොඩි එකාගේ සිට මහ එකා දක්වා සියලු දෙනා සමාගම්වල සාක්කුවල නිසා බව අමුතුවෙන් කියන්න උවමනාවක්ද නැත.

මෙවැනි කලක පාරිභෝගිකයින්වන අපිට දෙයියින්ගේ පිහිට හැර කාගේ නම් පිහිටක්ද?


පසු විපරම: 
පැය 48 කින් මේ බව සොයබලා ඇමතුමක් ගන්නවා යැයි කීවද කිසිම ඇමතුමක් හෝ නාලිකාව ඩිස්කනෙට් කිරීමක් සුදුවී නැත.
මම එදිනම මේබව විදුලිසංදේශ නියාමන කොමිසමට දැන්වුවද තවම පිලිතුරු email එකක්වත් නැත.